1.- ZEIN IZAN ZEN IRAKURRI ZENUEN LEHENDABIZIKO NOBELA BELTZA?

Urte asko dira lehenbiziko hartatik... ezin nezake erran. Irakurri ez baina filmak ikusi nituen lehenik, handik urteetara Igela argitaletxearen Sail beltzean irakurriko nituenak: 'Ez adiorik', 'Maltako belatza', eta, denak har, 'Postariak bi aldiz deitzen du beti'.

​

2.- ETA EUSKARAZ IRAKURRI DUZUN AZKENA?

Nobela beltz ortodoxoetan, 'Sotoan gordeak', Miren Gorrotxategirena. Heterodoxoetan, 'Puta', Nelly Arcanena, eta Jon Miranderen gurutziltzatzea.

​

3.- ERRAN NOBELA BELTZETAKO GUSTUKO PERTSONAI BAT

Zu zeu, erratekoz.

​

4.- GAIZKILEA, DETEKTIBEA, HILTZAILEA, POLIZIA, EBASLEA, IKERTZAILEA... ZEINEKIN IDENTIFIKATUKO ZINATEKE? ZERGATIK?

Gaizkilearekin, baina Jim Thompsonen nobeletakoa behar du izan, eta, hark, egiaz, badu gaizkiletik, hiltzailetik, poliziatik, ebasletik eta, gutiago, menturaz, detektibe eta ikertzaile zuritik.

​

5.- GAURKOASUNA DUEN ZEIN GERTAKARI KOKATUKO ZENUKE NOBELA BELZ BATEN TRAMAN?

Hedabideek kontatzen (ez) dizkiguten albisteen gibelean gordetzen direnak: gu Ebrora begira ezartzen gaituzte eta, aldiz, egiazko gertakaria Garaten da beti edo gehienean.

​

6.- ZEIN EGINEN ZENUKE NOBELA BELTZ BATEKO USTELA?

Gure auzo galegoa, eta haren bi anaiak. Galiziatik eskutsik lanera etorri eta zinezko inperioaren jabe dira oraingo egunean, bateko gasolindegi, besteko resort inportante, hango jatetxe apal eta hemengo bost izarreko hotel nagusi. Eta' gaiak' batetik bestera eramateko garraio-enpresa. Totala!

​

7.- ZEREZ EGINA DAGO MALTAKO BELATZA?

Azalaz ari zarete, ala mamiaz? Eskuan ibiliia dut, eta ez da barne-hutsa, erraten ahal dizut.

​

8.- ANTIOJO BELTZAK...ZERTARAKO APROPOSAK?

Munduaren zikinetik babesteko, egunero.

​

9.- ZEIN EDARI AUKERATUKO ZENUKE NOBELA BELTZA IRAKURTZEKO?

Nobela beltza irakurtzeko nahiz deusetarako, denik eta munduko orujorik gogor-azkarrena.

​

10.- NORI EGINEN ZENIOKE GALDETEGI HAU?

Jim Thompsoni, Nelly Arcani, Zumalakarregiren alargun Pankrazia Ollori... tonban ehortziak diren hainbertzeri. Bizien artean, gogo onez interpelatuko nuke Beñat Iturrioz, adibidez, Euskal Herriko zinemagile eskasena izateko bokazio beltza duenak badu aski merezimendu beltz.