1.- ZEIN IZAN ZEN IRAKURRI ZENUEN LEHENDABIZIKO NOBELA BELTZA?

Ez da nobela berez, baina Jordi Bernet eta Enrique Sánchez Abulíren TORPEDO komikia gogoratzen dut argien.

​

2.- ETA EUSKARAZ IRAKURRI DUZUN AZKENA?

Olga Tokarczuken Erabili goldea hilen hezurren gainetik

​

3.- ERRAN NOBELA BELTZETAKO GUSTUKO PERTSONAI BAT

Berriro galdetegiaren arauak haustera noa, nobela beharrean Degenesis rol jokoaren "Zure odolean" liburuko pertsonaia klabe bat proposatzeko: Neva, burdinezko mandataria (jatorrizkoan "Iron Emmisary"). Abentura/istorio osoa hilketa baten inguruan gertatzen da, eta egileek emakume indartsu, tragiko, konplexu eta sinesgarria eraiki zuten mundu sinestezin batean.

​

4.- GAIZKILEA, DETEKTIBEA, HILTZAILEA, POLIZIA, EBASLEA, IKERTZAILEA... ZEINEKIN IDENTIFIKATUKO ZINATEKE? ZERGATIK?

Detektibearekin edo hildakoarekin, sekretuekin oso erraz obsesionatzen naizelako. Detektibeak sekretua deskubritu nahi du eta hildakoak sekretua inork baino arinago deskubritu du azken finean!

​

5.- GAURKOASUNA DUEN ZEIN GERTAKARI KOKATUKO ZENUKE NOBELA BELZ BATEN TRAMAN?

Nobela beltz geopolitiko bat irakurri/idatziko nuke gustora Nord Stream hodien leherketaren gertakarien inguruan! Krimenak! Gerra! Talde sekretuak! Gezurrak! Kazetari baten ikuspegitik egongo litzateke kontatuta. Ez da ondo amaitzen.

​

6.- ZEIN EGINEN ZENUKE NOBELA BELTZ BATEKO USTELA?

Bere ohore kode eta sinesmen sistemari garrantzia handia ematen dion pertsona bat. Ez ustela zentzu klasiko eta alferrean, baizik eta prezisoki bere integritateak ustelkeriara bultzatu duen norbait.

​

7.- ZEREZ EGINA DAGO MALTAKO BELATZA?

Benetako txokolatez. Txokolate honen zaporearen ondoan munduko beste txokolate guztiak imitazio txarrak baino ez dira. Zoritxarrez ez dakigu, inork ez daki non dagoen, edo norbaitek jan ote duen honezkero.

​

8.- ANTIOJO BELTZAK...ZERTARAKO APROPOSAK?

Itsutzat har zaitzaten. Lasai eta presarik gabe begiratzeko begiratu beharrekoak.

​

9.- ZEIN EDARI AUKERATUKO ZENUKE NOBELA BELTZA IRAKURTZEKO?

Kafea. Beltza.

​

10.- NORI EGINEN ZENIOKE GALDETEGI HAU?

EBLA liburudendako Eneko Sanchezi